Gen 4 | TVK | STEP | Di, Adam de visal atou nan e xi meas ni tuvava tei. Melengien vahis mei mitavi, xi ngguri ma miling hisen be 'Ken' xa koute teni be 'nangguri' vengan xa biteni bit, “Nggo tutouen na Iahova, inou nanggur horamue tei.”

Genesis 4

Ken Bas Vin Evel

Senesis 4:1-12, 25-26

1 Di, Adam de visal atou nan e xi meas ni tuvava tei. Melengien vahis mei mitavi, xi ngguri ma miling hisen be 'Ken' xa koute teni be 'nangguri' vengan xa biteni bit, “Nggo tutouen na Iahova, inou nanggur horamue tei.” 2 Di, Iv meas rilomun. E melele xa aveti nan pipin, xi nggur tuvava tei mun, e miling hisen be 'Evel'.

Melele xa lumatu mei lube tellep, Evel bemei be moletin xa di milaxat sipsip xil, e Ken bemei be moletin xa di pol e naho. 3 Huram vahis mei mitavi, e vatei, Ken bit vasa huit polien nan mi Iahova. Ma misak ni mileh anien tatei xa telihi, e misa ni be sanien eo nan te memesien mi Iahova. 4 E Evel mun nggur huit polien nan xa be mui sipsip tei san, basi mat, e misa rut tenben xil xa bos mak mu be sanien eo nan te memesien ba mi Hi. E Iahova miketeh bos ni Evel e sanien eo nan. 5 E mi Ken e sanien eo nan, Hi misin ni. Misak ni, Ken ien mikat e ekaten nan misak ni valnaon mikenu. 6 Ma, Iahova biteni mini bit, “?Veneh ma di iem mikat mak? ?Veneh ma valnaom di mikenu mak? 7 Xosxa upol ni sexien xa momal, ma niketeh ihos ni xouk e sanien nam. E xosxa upol ni sexien xa misa, tesaen di minggus tiluk tengan vapurunuk. Tesaen ak bit vahe vat e meulien nam, e xouk iaxa, uhasi ihe etan e umei uhe vat teni.”

8 Di, Ken biteni mi tuneli bit, “Ralmea ra ut ak, ralha mu naho.” E melele xa luduxoh rute ak, Ken biles mi tuneli e bas vini mat.

9 Di, Iahova misis Ken bit, “?Tumali Evel, da xave?”

E Ken bit rilomun ni mini bit, “Natakil ti. ?Midep? ?Inou iaxa ti nilaxat tua navan?”

10 E Iahova biteni mini bit, “?Ken, opol ni naha? ?Otalong ti? !Re tumali di midang minou ra tan bit uvinat naha xa opol ni! 11 Isak ni, halesil tei ita xatuk tengan tan nasa ti mun anien minuk, vengan xa mu re tumali xa otehas vini. 12 Melele xa ulih pis anien tei, tan nasa xoles ti huit polien nam. E xouk, vehakut ulesae ra moletin sav xil e voninom xati ihe tovuol.”

25 Huram vahis mei mitavi, Adam de visal atou nan ma Iv meas rilomun e nggur tuvava tei mun nalu xa be malohos. E miling hisen be 'Set' xa koute teni be 'misa ni' vengan xa biteni bit, “Hi misa tuvava tei mun tengan vahur von Evel xa Ken tehasi temat.” 26 Melele xa Set mei be eilep, xi nggur atou tei. E melele xa de visali, atou nan nggur tuvava tei nan e miling hisen be 'Inos'. E melele nen ak vari, moletin xil di latemot mi Hi e latekes kokot ni hisen xa be 'Iahova'. ^{▼▼4:26 Iahova be his xati na Hi xa be eo xa koute teni be 'NADA'.}

Set, muimol nan tehe Inos.
Inos, muimol nan tehe Kenan.
Kenan, muimol nan tehe Mahalalel.
Mahalalel, muimol nan tehe Sered.
Sered, muimol nan tehe Inok.
Inok, muimol nan tehe Metuselah.
Metuselah, muimol nan tehe Lamek.
Lamek, muimol nan tehe Noah.
E Noah, horamue nan tehe tol,
Sem, Ham e Sevet.
Moletin xil ak latexo vatimol na Adam, e meulien nae tehe teviei. Xil lateleh horamue nae xil latehe holu e mei latepolu e ut etan. E xil holu latnahusil ti mun Iahova.